Category: September 2020

September 2020

Letters to Malaya

𝐋𝐄𝐓𝐓𝐄𝐑𝐒 𝐓𝐎 𝐌𝐀𝐋𝐀𝐘𝐀. ni Angelo Aurigue

November 26, 1972

Mahal,

Sorry kung hindi tayo makapagkita nang madalas. Hatid sundo kasi ako ni daddy ngayon. Hindi rin kami gaano pinapagamit ng phone gawa ng maraming tawag mula sa mga tao sa munisipyo. Kumusta ka? Sila tita? Dumadami ang naggugulo sa may bandang Espanya. Sabi ni daddy, nanghuhuli na rin ng mga nasa labas pa pagkatapos ng curfew. Mag iingat kang palagi, magkita na lang tayo ng miyerkules pagkatapos ng klase.

Mahal kita,

Lia

November 30, 1972

Lia,

Mahal, nabalitaan mo na ba? Hindi pa rin umuuwi si Mateo sa kanila. Nakakapagalala lang kasi huling kita ko sa kanya nung magkakasama pa tayo noong Martes. Kasama ata siya sa mga nag organisa ng protesta sa campus kahapon. Natatakot ako, mahal pero mas nakababahala ang mga nangyayari. Nakakabahalang manahimik na lang sa gitna ng lahat ng nangyayari. Kapag hindi pa umuwi si Mateo bukas, baka ako na mismo maghanap sa kanya. Magpapasama na lamg ako kay Obet. Magtatanong tanong din ako sa mga kakilala ko sa mga nagpoprotesta.

Nagmamahal,

Adonis.

September 2020

…

𝐌𝐆𝐀 𝐏𝐀𝐆𝐖𝐀𝐑𝐈 ni Maureen Dames

Hamog sa bukang-liwayway at wala nang makita

Pagdating ng umaga’y pilit gisingin, ganoon pa rin ang putla

Mga kasama sa paligid tagong lumalaban

Ingat ka, kaibigan, tayo’y magkikita pa

Mga berdugong luntian at asul na nagmamartsa hanggang takipsilim

Walang takot kumitil at magpadanak ng dugo

Sa isang utos ng pinuno, isang salita, isang kumpas

Para sa kapalit na salaping ikalulunod nila

Paghihirap, mga kulubot sa kamay na mula sa pagbubungkal

Pagpapatahimik, mga busal na sa mga labi inilalagay

Pagtitiis, mga hirit mula sa mabibigat na kamay na pilit iniilagan at tinatakpan

Pagtatago, tinatakasan ang mga bigat ng paang nagmamartsa at pagkiskis ng gatilyo

Dahas, pagsabog, halakhak, karahasan

Pangako ay pagtigil sa pangungurakot

Sakit, pag-iwas, sigaw, kapabayaan

Hindi na karapatan ang inaalagaan, kundi pansariling balak

Hindi manikin ang taong kaya manlinlang

Dahil pagsapit ng panahong magising sa katotohanan

Gabi ay liliwanag, walang alapaap na haharang

Sa isang sigaw ng paglaya ay mga luhang mapagpalaya.

September 2020

…

Mga likhang sining-biswal para sa buwan ng Setyembre

𝐄𝐀𝐓 𝐓𝐇𝐄 𝐑𝐈𝐂𝐇 ni Saboba

Matagal ko nang inasam na makalikha ng isang pamprotestang sining, kaya nung nabigyan ako ng unang pagkakataon para dito, nilubos ko na yung opportunidad. “Eat the Rich” ay galing sa kasabihan ni Jean-Jacques Rousseau’s na “When the people shall have nothing more to eat, they’ll eat the rich.”

Ang larawan na ito ay naglalaman na reperensiya galing sa iba’t ibang bagay tulad ng sandamakmak na koleksyon ng sapatos ni Imelda Marcos, pati na din ang keyk na inspirado mula sa kontrobersyal na bestida na ginawa ni Mak Tumang para kay Imee Marcos noong SONA 2019. Nawa’y habang ginugunita natin ang isa sa pinakamasang panahon sa ating kasaysayan ay hindi natin makalimutan ang karahasang dinasa.

𝐌𝐆𝐀 𝐇𝐀𝐋𝐈𝐌𝐀𝐖 ni Jay Dul-loog

Noong kamakailan lamang ay napanood ko yung pelikulang “Blindspotting”, at hindi ko maiwasang makita ang pagka katulad ng abuso ng mga pulis sa Amerika sa mga pulis ng sarili nating bansa; mula noon hanggang ngayon. Ang mga inosenteng buhay na inabuso at pinatay nang walang pinag-iisipan dahil lamang sila’y mahihirap, o kaya naman kritikal sa mga mali ng gobyerno.

Mapapaisip ka na lang kung sino talaga ang kanilang pinoprotektahan, hindi ba?

𝐀𝐍𝐆 𝐌𝐀𝐍𝐓𝐒𝐀 ni Gamooshara

Ang mga patak ng luhang nagmula sa hinagpis ng nakaraan man ay natuyo sa paglipas ng araw, nananatili ang bakas ng sugat, kalakip ang lagim na alaala, sa ating inang lupa